Одкон Холдинг нь инженерчлэл, угсралт, сантехник, дулаан хангамжийн чиглэлээр үүсгэн байгуулагдсан, 35 жилийн түүхтэй үндэсний компани юм. Өнөөдөр бид эрчим хүч, цахилгаан, салхивч, үйлдвэрлэл, худалдаа, санхүүгийн үйлчилгээ, оффисын түрээс чиглэлээр үйл ажиллагаагаа өргөжүүлэн 8 охин компанитайгаар ажиллаж байна.
Бид мэдлэг, туршлагаас гадна зөв хандлага, суралцах хүсэл эрмэлзлийг үнэлдэг. Тиймээс мэргэжлийн техник, технологийн сургуулиудтай хамтран “Цалинтай дадлага” хөтөлбөр хэрэгжүүлж, ирээдүйн боловсон хүчин бэлтгэн хөгжүүлдэг.
Мөн нарийн болон нарийн бус мэргэжлээр дадлагажин суралцах, ажлын байран дээр ур чадвараа хөгжүүлэх боломжийг ажилтан бүрт нээлттэй олгодог. Туршлага бага байсан ч өсөн хөгжих хүсэлтэй хүмүүсийг бид багийнхаа нэг хэсэг болгохыг зорьдог.
Одкон Холдинг нь ажилтан бүрийн мэдлэг, ур чадварын хөгжлийг байгууллагын тогтвортой өсөлтийн үндэс гэж үздэг.
Хүний нөөцийн албанаас дотоод болон гадаад сургалтуудыг тогтмол зохион байгуулж, ажилтнуудыг мэргэжлийн болон хувь хүний хөгжлөөр тасралтгүй дэмжин ажилладаг.
Бид мэргэжлийн зэрэг ахиулах, ур чадвараа нэмэгдүүлэх, залгамж халаа бэлтгэх, удирдлага манлайллын чадамжийг хөгжүүлэх хөтөлбөрүүдийг хэрэгжүүлж, ажилтан бүрт карьерын өсөлтийн боломжийг бүрдүүлдэг.
Бид ажилтнуудынхаа ажил, амьдралын чанарыг сайжруулахад чиглэсэн олон төрлийн хангамж, дэмжлэгийг санал болгодог.
“Залуу гэр бүлийг дэмжих хөтөлбөр”-ийн хүрээнд тогтвор суурьшилтай ажилласан ажилтанд компанийн орон сууцанд тодорхой хугацаанд үнэ төлбөргүй амьдрах боломж олгодог.
Мөн удаан жилийн нэмэгдэл, гүйцэтгэлд суурилсан урамшуулал, сувиллын хөнгөлөлт, эрүүл мэндийн тогтмол үзлэг, гэнэтийн ослын даатгал, тэтгэмж туслалцаа, ажилтны нийгмийн баталгааг дэмжих бусад хөтөлбөрүүдийг хэрэгжүүлэн ажиллаж байна.
